Zaban shugaba a cikin mutane yana da matukar muhimmanci a rayuwarsu ta Addini da rayuwarsu ta Duniya.
Rayuwar mutane ta Addini ba ta cika sai da kyakkyawan shugabanci da zai kare manufofin Shari'a, na kare Addini ta hanyar umurni da kyakkyawa da hani ga mummuna da tsayar da haddi da tsayar da adalci da mayar da hakkoki ga ma'abotansu da Jihadi saboda Allah, da kare rayuka da hankulan mutane.
Haka in ka dawo bangaren rayuwar Duniyar mutane, rayuwar ba ta inganta sai da ingantaccen shugabanci da zai samar da tsaro da cigaban kasa ta hanyar inganta harkar ilimi da bunkasa harkar noma da kasuwanci da habaka tattalin arziki da samar hasken wutan lantarki da makamashi da kuma bunkasa harkar kimiyya da fasaha da zai inganta harkar kiwon lafiya da kere-kere, da samar da kayan more rayuwa da duk abin cigaban rayuwa yake bukata.
To shi shugabanci yana bukatar manyan siffofi guda biyu:
1- Karfin iko
2- Rikon amana.
Sai kuma ka kara da wanda zai kare maka Addininka da rayuwarka.
Don haka wannan zabe da ya dawo hanun gama-garin mutane yana da matukar muhimmanci, don haka ya kamata ka fita ka zabi wanda kake ganin shi ya fi dacewa ya zama shugaba a kasarka, wanda yake da karfi da rikon amana, wanda zai kare maka Addininka ya inganta maka rayuwarka ta Duniya.
Ya Allah ka damka shugabancinmu a hanun masu rikon amana, wadanda za su yi kokarin samar da tsaro a kasa da bunkasa tattalin arziki, don mu samu nitsuwa da daman bauta maka, da tsayar da Shari'arka a kan kanmu.
Rubutawar: Dr. Aliyu Muh'd Sani
Comments
Post a Comment