Magungunan Musulunci Fitowa Ta farko

 AHLUS SUNNA A TSAKIYA SUKE A GAME DA HANKALI

A game da hankali, tafarkin Ahlus Sunna Mabiya Salaf matsakaici ne tsakanin masu wuce iyaka game da shi, da kuma masu sakaci da wofintar da shi.

'Yan Falsafa (Philosophers) da kuma da yawa daga cikin mabiya "Ilmul Kalam" da 'Yan Boko Aqida (Intellectuals) suna fifita hankali suna kai shi matsayin da bai kai ba, ta yadda suke sanya shi a matsayin tushen daukan ilmukansu, ta yadda suke mayar da Qur'ani da Sunna da Imani a matsayin mabiya ga hankalin.

A daya hanun kuma, 'Yan Darikun Sufaye sun saba ma wadannan, ta yadda suka wulakanta hankali, suka zarge shi suka aibanta shi, ta yadda suke ganin cewa; ba a samun matsayi da daukaka sai ta hanyar jefar da hankali. Shi ya sa Sufayen suke tabbatar da abubuwan da hankali yake karyatawa. Suke yabon maye da hauka da sauran yanayi na gushewar hankali, saboda a wajensu sai mutum ya isa wani matsayi na gushewar hankali kafin ya isa zuwa ga Hakika ko "Fana'i" da sauran matsayi da halaye da su ne kololuwar daraja a wajensu.

To su Kungiya ta farko sun wuce gona da iri ta yadda suka tabbatar da wajibcin abubuwa ko yuwuwarsu ko koruwansu ta hanyar hujjoji na hankali tsantsa, suka kudurta cewa su ne gaskiya alhali bata ne, sai suka kalubalanci abin da Manzo (saw) ya zo da shi daga wajen Allah.

Su kuma Kungiya ta biyu, sun yi sakaci da lamarin hankali har suka tara gaskata karya da aikata munanan aiyuka a tafarkinsu, sai suka fita daga fagen hankali da Allah ya fifita 'Yan Adam da shi a kan sauran dabbobi.

Sai Allah ya shiryar da Ahlus Sunna Mabiya Salaf zuwa ga tafarki mikakke matsakaici, da hanya madaidaiciya.

Don haka wadancan Kungiyoyi guda biyu dukkansu abin zargi ne, saboda hankali sharadi ne na sanin ilmuka da cika da gyaruwan aiyuka. Da hankali ilimi da aiki suke cika. Amma kuma hankalin ba cin gashin kansa yake yi ba, wajen sanin ilmuka da aikata kyawawan aiyuka.

Don ka fahimci wannan, ga bayani kamar haka; Shi hankali wani karfi ne da yake cikin rai, kamar karfin kallo a cikin ido. Idan hasken Imani da Qur'ani da Sunna ya hadu da hankali to zai kasance ne kamar karfin kallo da yake cikin ido idan ya hadu da hasken rana ko wuta. Ta yadda idan an bar idon da karfin kallonsa kawai da ba zai iya ganin komai shi kadansa ba.

Shin idan ka shiga daki mai duhu za ka iya ganin wani abu?

To kamar haka ne, in hankali bai hadu da hasken Imani da Qur'ani da Sunna ba, to ba zai isa ga ingantattun ilmuka da kyawawan maganganu da aiyuka ba.

Kamar haka kuma in an cire hankalin daga cikin maganganun mutane da aiyukansu sai su zama aiyukan dabbobi.

Da wannan za ka san girman zalunci da ake yi wa Ahlus Sunna Mabiya Salaf ake cewa; -wai- ba sa nazari da aiki da hankali, kawai makauniyar biyayya suke yi, har ake cewa; -wai- suna inkarin Dalilai na hankali. Lallai wannan ba dadai ba ne, kuma zaluntar Ahlus Sunnan ne. Saboda Mabiya Salaf sun yarda da abin da Qur'ani ya zo da shi na umurni da nazari da lura da tadabburi a cikin Ayoyi masu yawa, kuma suna aiki da su. Su dai abin da ba su yarda da shi ba shi ne gabatar da hankalin a kan abin da Allah ya saukar, da ba shi 'yancin cin gashin kai, saboda in dai hankali lafiyayye ne to babu yadda za a yi ya wuce gaban abin da Mahallicinsa ya saukar. Saboda komai girman kunne ba zai wuce kai ba.