Nassin Shari'a ba ya cin karo da zamani

 Nassin Shari'a ba ya cin karo da zamani, saboda Shari'ar Muslunci ta zo ne da samar da amfani da kawar da cuta, duk wani abun da akwai Maslaha da amfani a cikinsa to Shari'a ta zo da shi, kuma tana umurni da shi. Haka duk wani abu da a cikinsa akwai barna da cutarwa to Shari'a tana hani a kansa.

Don haka duk lokacin da wani ya yi zaton cewa; Nassin Shari'a ya yi hani a kan wani abu da yake akwai Maslaha da amfani na rayuwar Duniya a cikinsa ko ta yi umurni da abin da akwai barna ko cutarwa a cikinsa to lallai bai fahimci Nassin ba ne, saboda ka'ida ce: Nassin Shari'a ba ya cin karo da Maslaha ko abu mai amfani da aka same shi daga baya cikin wannan zamani, bayan saukan Nassin na Shari'a.

Don haka ababen da aka samar a wannan zamani masu amfani da wadanda akwai Maslaha mai rinjaye a cikinsu ba sa cin karo da Nassin Shari'a, kuma Shari'a ba ta hani a kansu. Hasali ma umurni take yi da samar da su. Saboda abin da Shari'a ta zo samarwa kenan, wato Maslaha da amfanin bayi a cikin rayuwarsu ta Duniya da ta Lahira.

Allah ya ce ga Annabi (saw):

{وَمَا أَرْسَلْنَاكَ إِلَّا رَحْمَةً لِلْعَالَمِينَ } [الأنبياء: 107]

"Ba mu aiko ka ba face rahama ga talikai".

Izzuddeen bn Abdissalam ya ce:

اعلم أن الله شرع لعباده السعي في تحصيل مصالح عاجلة وآجلة...

وكذلك شرع لهم السعي في درء مفاسد في الدارين أو في أحدهما...

وكل ذلك رحمة بعباده ونظر لهم ورفق

قواعد الأحكام في مصالح الأنام (2/ 161 - 162)

"Ka sani cewa; lallai Alla ya shar'anta ma bayinsa kokarin samar da Maslaha ta kusa ko ta nesa...

Haka kuma ya shar'anta musu kokarin kawar da barna a Duniya da Lahira ko a daya daga cikinsu...

Duka wannan saboda rahamarsa ne ga bayinsa da dube gare su da rangwamensa gare su".

Saboda haka Nassin Shari'a ba ya cin karo da abubuwa masu amfani na zamani.

All reactions:

55